Saturday, March 9, 2019

Trolls ni Duterte


Nagdiriwang ang mga DDS sa pagpirma ni #PGong ng mga batas tulad ng Expanded Maternity Leave, Free College Education at Universal Health Law. Full credits ang mga DDS sa presidente ah – parang s’ya lang ang may gawa ng lahat.



Ang nakakalungkot – mga citizens sa Facebook ang mga nauuto ng mga DDS na ‘to. Kung kaya mong mag-Facebook, may access ka rin sa Internet. Kayang-kaya mong i-Google kung sino ang primary author ng mga bills na ito para naman i-credit mo ang congressman at senador. Wag puro sa presidente ang credit dahil hindi pa naman n’ya napapatupad ang mga batas na ito ng maayos.

Madami sa mga DDS na ito ay nakapagtapos naman ng college. Ibig sabihin, nakatapos naman ng Constitution 101. Alam naman siguro nila ang 3 sangay ng pamahalaan natin – Legislative, Executive at Judiciary. Legislative (House of Representatives at Senate) ang gumagawa ng batas, Executive (Office of the President) ang nagpapatupad ng batas, at Judiciary ang nagi-interpret kung ang mga batas na ito ay ayon sa Saligang Batas, among other functions.

Okay naman i-credit ang pangulo sa mga inilabas nitong Executive Orders tulad ng Nationwide Smoking Ban, FOI sa Executive Branch, DOLE order regarding contractualization, atbp. Ang mga ito ay galling mismo sa pangulo at hindi naman tinutulan ng Korte Suprema. Ibig sabihin, naaayon naman sa Saligang Batas (Konstitusyon) – o walang nagsampa ng reklamo sa Korte Suprema.

Pero ang mga batas na ipinasa sa pangulo para pirmahan, bakit sa kanya lang nag credit ng mga DDS? Dahil ba ang mga batas na ito ay gawa ng mga senador na nasa oposisyon tulad nila Bam Aquino (Free Education Act) at Risa Hontiveros (Expanded Maternity Leave Act). Bakit kailangang i-demonized ang mga senador na nasa oposisyon eh nagta-trabaho naman sila?

Hindi maintindihan ng mga DDS na ang papel ng Ehekutibo ay ipatupad ang mga batas na ipinasa (at napirmahan) ng Lehislatibo. Dapat husgahan ang Presidente (bilang pangunahing opisyal ng Ehekutibo) ayon sa pagpapatupad n’ya ng batas. Halimbawa, sa National ID System. Nung isang taon pa ito naging batas pero hanggang ngayon, wala pang ginagawa ang Presidente para maisakatuparan ito.

Hindi ko rin maintindihan kung bakit ang mga DDS na ito ay mabilis mauto nila Thinking Pinoy, Mocha at Sassot gayong may access naman sila sa Internet. Kayang-kaya naman nila i-fact-check ang mga pino-post ng mga ito sa kanilang social media accounts. Siguro katamaran na lang kaya tinatanggap na lang nila ang mga research diumano ng mga DDS bloggers na ito. Nakakalungkot.

Nawa’y gamitin natin ng tama ang ating pribilehiyo na makapag-Internet. Huwag tayong dumagdag sa pagkakalat ng unverified reports (or worst, fake news). Huwag tayong maniwala agad-agad ng mga nababasa natin sa mga Facebook pages. Huwag natin siraan ang mga nasa oposisyon kundi maging mapagmatyag at maging matalino tayo sa pagsusuri ng mga FB posts. Sa gayon, hindi tayo madaling mauuto ng mga bayarang trolls at bloggers ng administrasyon.

Huwag din tayo pa-apekto agad sa mga negative comments na nakikita natin. Suriin din natin kung ang nagpo-post ng mga komentong ito ay troll or lehitimong FB o Twitter user. Maglaan ng konting panahon upang tignan kung kelan ginawa ang accounts nila. Ilan ang friends/followers? Kung mga tipong 11 followers at 0 followers at ginawa ng 2018, malamang na troll nga. Huwag nang patulan.